अंगारकी चतुर्थीला वरदविनायक सेवाधाम फुलले; १० हजारांहून अधिक भाविकांनी घेतला दर्शनाचा लाभ

अंगारकी चतुर्थीला भाविकांची मांदियाळी; दर्शन, महाप्रसाद अन् हरिकीर्तनाने लोणी दुमदुमले

लोणी,प्रतिनिधी : अंगारकी चतुर्थीच्या मंगल पर्वावर लोणी येथील श्री वरदविनायक सेवाधाम येथे भक्तीचा अक्षरशः महासागर लोटला. मंगळवार, दि. २९ सप्टेंबर रोजी झालेल्या अंगारकी चतुर्थी उत्सवाला पंचक्रोशीतील भाविकांनी मोठ्या श्रद्धेने हजेरी लावत श्री वरदविनायकाचे दर्शन घेतले. दिवसभरात १० हजारांहून अधिक भाविकांनी दर्शन व महाप्रसादाचा लाभ घेतला. त्यामुळे संपूर्ण मंदिर परिसर गणरायाच्या जयघोषाने आणि भक्तिमय वातावरणाने भारावून गेला.

अंगारकी चतुर्थीनिमित्त पहाटेपासूनच सेवाधाममध्ये धार्मिक विधींना प्रारंभ झाला. श्रींची नित्यनियम पूजा, अभिषेक व आरती झाल्यानंतर लोणी खुर्द, लोणी बुद्रुक, निर्मळक्षेत्री तसेच पंचक्रोशीतील विविध भजनी मंडळांनी भजनसेवा सादर केली. भक्तिगीत, अभंग आणि गणरायाच्या जयघोषाने मंदिर परिसरातील वातावरण अधिकच मंगलमय झाले.

सायंकाळच्या नित्यनियम आरतीनंतर ह.भ.प. महंत उद्धवजी महाराज मंडलिक-नेवासेकर यांच्या हरिकीर्तनाचा कार्यक्रम झाला. अध्यात्म, भक्ती आणि संस्कारांचा संदेश देणाऱ्या त्यांच्या कीर्तनाला भाविकांनी मोठ्या संख्येने उपस्थित राहून उत्स्फूर्त प्रतिसाद दिला.

महाप्रसादासाठीही भाविकांची मोठी गर्दी

दर्शनासाठी दिवसभर भाविकांची रांग लागली होती. दूरवरून आलेल्या भाविकांसाठी सेवाधाम परिवाराच्या वतीने महाप्रसादाची सुयोग्य व्यवस्था करण्यात आली होती. दर्शनासोबतच हजारो भाविकांनी महाप्रसादाचा लाभ घेतला. गर्दीचे नियोजन, भाविकांची सेवा आणि कार्यक्रमाची शिस्तबद्ध अंमलबजावणी यामुळे उत्सव सुरळीत पार पडला.

अंगारकी चतुर्थीचा हा सोहळा भक्ती, सेवा आणि अध्यात्माचा सुंदर संगम ठरला. श्री वरदविनायक सेवाधाम परिवार, भजनी मंडळे, स्वयंसेवक आणि भाविकांच्या सामूहिक सहकार्याने उत्सवाला भव्य स्वरूप प्राप्त झाले.