કપડવંજ ખાતે રત્નાકરમાતા રોડ યુવક મંડળ દ્વારા શ્રીગંગા મહા આરતી યોજાઈ

કપડવંજ: શહેરમાં ગણેશોત્સવની ભક્તિમય ઉજવણીના ભાગરૂપે રત્નાકરમાતા રોડ યુવક મંડળ દ્વારા આયોજિત સાર્વજનિક ગણેશોત્સવ મહોત્સવ અંતર્ગત શ્રીગંગા મહા આરતીનું ભવ્ય આયોજન કરવામાં આવ્યું હતું. મહા આરતી દરમિયાન વિશાળ દીવડાઓ સાથે આરતી ઉતારવામાં આવતા સમગ્ર વાતાવરણ ભક્તિમય બની ગયું હતું.

આરતીના દર્શન કરવા મોટી સંખ્યામાં ભક્તો અને સ્થાનિક નગરજનો ઉપસ્થિત રહ્યા હતા. ભક્તોએ શ્રદ્ધાપૂર્વક આરતીમાં ભાગ લઈ ગણપતિ બાપાના જયઘોષથી વાતાવરણ ગુંજાવી દીધું હતું.

આ પ્રસંગે ફૂલોની શોભા અને દીવડાઓના પ્રકાશથી આરતી સ્થળનું મનોહર દૃશ્ય સર્જાયું હતું. રત્નાકરમાતા રોડ યુવક મંડળના કાર્યકરો દ્વારા કાર્યક્રમની સુંદર વ્યવસ્થા કરવામાં આવી હતી.

ગણેશોત્સવ દરમિયાન આયોજિત આ મહા આરતી ભક્તો માટે આસ્થાનું વિશેષ કેન્દ્ર બની હતી.