‘शाळेचे ऋण फेडण्याची वेळ आली !’ माजी विद्यार्थ्यांनी विद्यालय विकासासाठी पुढे यावे : रावसाहेब म्हस्के पाटील

कर्मवीर भाऊराव पाटील जयंती उत्साहात
आदर्श विद्यार्थी, स्पर्धा विजेते व देणगीदारांचा गौरव

कोल्हार प्रतिनिधी : रयत शिक्षण संस्थेचे संस्थापक पद्मभूषण डॉ. कर्मवीर भाऊराव पाटील यांच्या १३९ व्या जयंतीनिमित्त रयत शिक्षण संस्थेच्या न्यू इंग्लिश स्कूल व कनिष्ठ (कला) महाविद्यालय, कोल्हार बुद्रुक येथे जयंती सोहळा उत्साहात पार पडला. यावेळी आदर्श विद्यार्थी, विविध स्पर्धांतील विजेते तसेच विद्यालयाला आर्थिक व इतर स्वरूपात योगदान देणाऱ्या देणगीदारांचा मान्यवरांच्या हस्ते गौरव करण्यात आला.
कार्यक्रमाच्या अध्यक्षस्थानी रयत शिक्षण संस्थेचे जनरल बॉडी सदस्य रावसाहेब नाथाजी म्हस्के पाटील होते. प्रमुख अतिथी म्हणून मॅनेजिंग कौन्सिल सदस्य ॲड. संदीप वर्पे पाटील, नवनियुक्त जनरल बॉडी सदस्य किरण कडू पाटील, स्थानिक सल्लागार समितीचे अध्यक्ष . ॲडसुरेंद्र खर्डे पाटील, उद्योजक प्रशांत कुठले पाटील, डॉ. शशिकांत काळे आदी उपस्थित होते.
मुख्याध्यापक अंकुशराज जामदार यांनी स्वागत व प्रास्ताविक केले. ज्येष्ठ शिक्षक शब्बीर शेख यांनी देणगीदार तसेच स्व. माधवराव खर्डे पाटील स्मृती स्पर्धेतील विजेत्यांची नावे जाहीर केली. इयत्ता दहावी मधील भक्ती संतोष रोकडे व सिद्धांत सतीश होले यांची आदर्श विद्यार्थी म्हणून निवड करून गौरव करण्यात आला.
विद्यालयाच्या नवीन इमारतीसाठी माजी विद्यार्थी उद्योजक प्रशांत कुठले पाटील यांनी पाच लाख रुपयांची देणगी देऊन सहकार्य केले. इमारतीसाठी सुमारे दोन ते अडीच कोटी रुपयांची आवश्यकता असून शिक्षकांनीही सुमारे चार लाख रुपयांचे योगदान दिल्याचे ॲड.सुरेंद्र खर्डे पाटील यांनी सांगितले.
ॲड.संदीप वर्पे पाटील यांनी विद्यार्थ्यांनी अभ्यासासोबत आधुनिक कौशल्ये आत्मसात करून विविध क्षेत्रांत यश मिळवावे, असे आवाहन केले. रावसाहेब म्हस्के पाटील यांनी माजी विद्यार्थ्यांच्या माध्यमातून विद्यालयाच्या विकासासाठी निधी उभारण्याचे आवाहन केले.
कार्यक्रमास सामाजिक, शैक्षणिक व उद्योग क्षेत्रातील मान्यवर, ग्रामस्थ, सेवकवृंद तसेच विद्यार्थी मोठ्या संख्येने उपस्थित होते. सूत्रसंचालन संग्राम गोपाळे, शब्बीर शेख व दीपक मगर यांनी केले. आभार सीताराम बोरुडे यांनी मानले.