प्रयोगशील शेतीला यशाची मोहर; आसावा फार्मचा ऊस उत्पादनात प्रथम क्रमांक

ऊस उत्पादन स्पर्धेत प्रथम क्रमांक; आधुनिक तंत्रज्ञानासह पर्यावरणपूरक शेतीचा आदर्श

सोनगाव प्रतिनिधी : सहकारमहर्षी भाऊसाहेब थोरात सहकारी साखर कारखाना, अमृतनगर यांच्या २०२६-२७ गळीत हंगामातील ऊस उत्पादन स्पर्धेत चणेगाव येथील त्रिमूर्ती आसावा फार्मने सुरू ऊस उत्पादनात प्रथम क्रमांक पटकावला. गट क्रमांक २०२/१ मधील अवघ्या ८० आर क्षेत्रातून तब्बल १११.०८८ टन ऊस उत्पादन घेत उल्लेखनीय कामगिरी नोंदविण्यात आली.
शास्त्रीय पद्धतीने ऊस लागवड, संतुलित खत व्यवस्थापन, पाण्याचा कार्यक्षम वापर, जैविक व रासायनिक निविष्ठांचा संतुलित वापर आणि आधुनिक कृषी तंत्रज्ञानाच्या प्रभावी अंमलबजावणीमुळे हे उत्पादन साध्य झाले. ऊस विकास विभागाचे मुख्य शेतकी अधिकारी भाऊसाहेब खर्डे व ऊस विस्तार अधिकारी बाळासाहेब सोनवणे यांच्या मार्गदर्शनाचा या यशात महत्त्वाचा वाटा राहिला.
“आसावा यांचे कृषी, पर्यावरण संवर्धन, जलसाक्षरता आणि भूमी सुधारणा क्षेत्रातील प्रयोग ऊस शेतीसाठी दिशादर्शक आहेत. त्यांची प्रयोगशीलता आणि कृषी तंत्रज्ञानाचा प्रसार शेतकऱ्यांसाठी प्रेरणादायी आहे,” असे प्रतिपादन कारखान्याचे उपाध्यक्ष पांडुरंग घुले यांनी केले.
डॉ. विठ्ठलदास बालकिसन आसावा यांनी शेतात बॅटरी पंपचलित ऊस बेणे प्रक्रिया, हुमणी नियंत्रणासाठी प्रकाश सापळे, सायकल कोळपे, वनस्पतीजन्य अर्क, वर्मी-कम्पोस्ट, जलसंधारण तसेच ठिबक व तुषार सिंचनासह सौरऊर्जेचा वापर केला आहे. माती परीक्षणावर आधारित खत व्यवस्थापन, आंतरपीक, हिरवळीचे खत, बीजप्रक्रिया, पीक फेरपालट, सापळा पिके व पक्षी थांबे अशा विविध प्रयोगांची ऊस विकास विभागाच्या अभ्यास गटाने पाहणी केली.
‘शेतात काडेपेटी न वापरण्याचा संकल्प’ करून पाचट व पिकांचे अवशेष न जाळता त्यांचा पुनर्वापर करण्यावरही आसावा यांनी भर दिला आहे. कृषी तंत्रज्ञानाच्या प्रसारासाठी फार्म स्कूल, शेतकरी मेळावे, कृषी परिषदा, लेखन व ‘कृषी पंढरी आसावा ’ या माध्यमातून ते सातत्याने कार्यरत आहेत.
या उल्लेखनीय कामगिरीबद्दल वार्षिक सर्वसाधारण सभेत लोकनेते बाळासाहेब थोरात, उपाध्यक्ष पांडुरंग घुले, कार्यकारी संचालक जगन्नाथ घुगरकर आदींच्या हस्ते त्रिमूर्ती आसावा फार्मचा गौरव करण्यात आला