खो-खोच्या मैदानात राहाता तालुक्याचा क्रीडा जल्लोष! ७० संघांची दमदार उपस्थिती; बाभळेश्वरात दोन दिवस रंगणार चुरशीचे सामने

बाभळेश्वर , प्रतिनिधी : राहाता तालुक्यातील शालेय विद्यार्थ्यांच्या क्रीडा कौशल्याला हक्काचे व्यासपीठ मिळवून देणाऱ्या तालुकास्तरीय खो-खो क्रीडा स्पर्धांना बाभळेश्वर येथे उत्साहात प्रारंभ झाला. १४, १७ व १९ वर्षे वयोगटातील मुला-मुलींच्या या स्पर्धांमध्ये सुमारे ७० संघ सहभागी झाले असून, दोन दिवस क्रीडांगणावर खो-खोचा थरार रंगणार आहे.

कै. श्री.

नाथाजी पाटील म्हस्के शैक्षणिक संस्थेचे विद्या विकास पब्लिक स्कूल, बाभळेश्वर, जिल्हा क्रीडा अधिकारी कार्यालय, अहिल्यानगर आणि श्री. यशवंतराव चव्हाण विद्यालय, राजुरी यांच्या संयुक्त विद्यमाने शैक्षणिक वर्ष २०२६-२७ अंतर्गत या स्पर्धांचे आयोजन करण्यात आले आहे.

शनिवार, ३ व रविवार, ४ ऑक्टोबर रोजी होणाऱ्या सामन्यांमुळे बाभळेश्वर परिसर क्रीडामय झाला आहे. स्पर्धेचे उद्घाटन संस्थेचे अध्यक्ष रावसाहेब नाथाजी पाटील म्हस्के यांच्या हस्ते झाले.

यावेळी विद्या विकास पब्लिक स्कूलचे प्राचार्य राजेंद्र नालकर, नाथाजी पाटील म्हस्के ज्युनिअर कॉलेजचे प्राचार्य ज्ञानेश्वर कांदळकर, कांबळे सर, सय्यद सर, राजेंद्र गायकर, अश्विनी पारखे मॅडम यांच्यासह विद्यार्थी, शिक्षक, क्रीडा मार्गदर्शक व क्रीडारसिक उपस्थित होते. जिल्हा क्रीडा अधिकारी कार्यालय व राहाता तालुका क्रीडा समितीच्या मार्गदर्शनाखाली सुनील गागरे (अध्यक्ष), अनिल चिंधे (कार्याध्यक्ष), राष्ट्रीय पंच राजेंद्र कोहकडे व बबनराव सातकर यांनी स्पर्धेचे कामकाज पाहिले.

स्पर्धेच्या यशस्वी आयोजनासाठी विद्या विकास पब्लिक स्कूलच्या शिक्षक व शिक्षकेतर कर्मचाऱ्यांनी परिश्रम घेतले.