વાંઝ ગામમાં મહિલા સરપંચ હીનાબેન પટેલના પાંચ વર્ષના કાર્યકાળમાં વિકાસનાં અનેક કાર્યો

વાંઝ ગામમાં મહિલા સરપંચ હીનાબેન પટેલના પાંચ વર્ષના કાર્યકાળમાં વિકાસનાં અનેક કાર્યો

અંડરગ્રાઉન્ડ વીજલાઇન, પીવાના પાણીની સુવિધા, બે કોમ્યુનિટી હોલ, પુસ્તકાલય, આરોગ્ય કેન્દ્ર અને ક્રિકેટ ગ્રાઉન્ડ સહિત અનેક વિકાસકાર્યો પૂર્ણ કરાયાં

સામાજિક કાર્યકર અશોકભાઈ પટેલ સહિત ગામના અગ્રણીઓ અને ગ્રામજનો દ્વારા સરપંચશ્રી તથા તેમની સમગ્ર ટીમનો હૃદયપૂર્વક આભાર વ્યક્ત કરાયો.

વાંઝ, તા. ચોર્યાસી, જિ. સુરત: સુરત જિલ્લાના ચોર્યાસી તાલુકાના વાંઝ ગામનાં લોકપ્રિય મહિલા સરપંચશ્રી હીનાબેન પટેલે પોતાના પાંચ વર્ષના કાર્યકાળ દરમિયાન ગામના સર્વાંગી વિકાસ માટે અનેક મહત્વપૂર્ણ કાર્યો કર્યાં છે. સામાન્ય વર્ગમાંથી આવતાં હોવા છતાં ગામનાં પ્રથમ મહિલા સરપંચ તરીકે ચૂંટાઈને તેમણે લોકસેવા અને વિકાસની નવી દિશા આપી છે. ચૂંટણી દરમિયાન ગ્રામજનો સમક્ષ આપેલાં વચનો પૂર્ણ કરવા માટે તેમણે પોતાની સમગ્ર ટીમ અને ગ્રામજનોના સહયોગથી સતત પ્રયત્નો કર્યા છે.

પાંચ વર્ષમાં થયેલાં મુખ્ય વિકાસનાં કાર્યો

હીનાબેન પટેલના કાર્યકાળ દરમિયાન વાંઝ ગામમાં વિવિધ ક્ષેત્રોમાં નીચે મુજબનાં વિકાસકાર્યો હાથ ધરવામાં આવ્યાં હતાં.

1. ગામમાં અંડરગ્રાઉન્ડ વીજલાઇન નાખવાનું કામ કરવામાં આવ્યું.
2. ગ્રામજનોને પીવાનું પાણી મળી રહે તે માટે પાણીની લાઇન નાખવામાં આવી.
3. ગામમાં ગેસલાઇનની સુવિધા ઊભી કરવામાં આવી.
4. ગામમાં સ્ટ્રીટલાઇટના પોલ તથા સ્ટ્રીટ લેન બોર્ડ લગાવવામાં આવ્યાં.
5. ગુજરાત વિધાનસભાના પ્રથમ અધ્યક્ષ સ્વ. શ્રી કલ્યાણજી વિઠ્ઠલભાઈ મહેતા (પટેલ) તથા ડૉ. બાબાસાહેબ આંબેડકરનાં સ્મારકો સ્થાપવામાં આવ્યાં.
6. વિદ્યાર્થીઓ અને વાંચનપ્રેમીઓ માટે પુસ્તકાલયની સુવિધા ઊભી કરવામાં આવી.
7. ગામના અગ્રણીના સહયોગ અને સ્પોન્સરશિપથી ભવ્ય પ્રવેશદ્વારનું નિર્માણ કરવામાં આવ્યું.
8. ગ્રામજનોની સુવિધા માટે બે કોમ્યુનિટી હોલ બનાવવામાં આવ્યા.
9. ગામની સુરક્ષા માટે સીસીટીવી કેમેરાની વ્યવસ્થા કરવામાં આવી.
10. ગ્રામજનોને આરોગ્ય સેવાઓ મળી રહે તે માટે પ્રાથમિક આરોગ્ય કેન્દ્ર બનાવવામાં આવ્યું.
11. યુવાનોને રમતગમત માટે પ્રોત્સાહન મળે તે હેતુથી ક્રિકેટ ગ્રાઉન્ડ બનાવવામાં આવ્યું.
12. ગામના દરેક વોર્ડમાં જાહેર કાર્યક્રમો અને સાંસ્કૃતિક પ્રવૃત્તિઓ માટે મ્યુઝિક સિસ્ટમની વ્યવસ્થા કરવામાં આવી.
13. દરેક વોર્ડમાં ગ્રામજનોને બેસવા, સામાજિક હેતુઓ માટે એકત્ર થવા અને પરસ્પર હળીમળીને સમય પસાર કરવા માટે મઢુલીની વ્યવસ્થા કરવામાં આવી.
14. ગ્રામજનોને પીવાના પાણીની સુવિધા મળી રહે તે માટે 2.15 લાખ લિટર ક્ષમતા ધરાવતી પાણીની ટાંકી બનાવવામાં આવી.

આ ઉપરાંત ગામની જરૂરિયાતો અને જનહિતને ધ્યાનમાં રાખીને અનેક જાહેર સુવિધાઓનાં કામો પણ કરવામાં આવ્યાં છે.

સરપંચશ્રીની સાથે ટીમ અને ગ્રામજનોનો પણ મહત્વનો ફાળો

ગામના વિકાસનાં કાર્યો માત્ર એક વ્યક્તિના પ્રયત્નોથી શક્ય બનતાં નથી. હીનાબેન પટેલના કાર્યકાળ દરમિયાન તેમની સમગ્ર ટીમ, ગામના અગ્રણીઓ, દાતાઓ, સહયોગીઓ અને ગ્રામજનોનો પણ મહત્વનો ફાળો રહ્યો છે. સૌના સહકારથી ગામમાં વીજળી, પાણી, આરોગ્ય, શિક્ષણ, સુરક્ષા, રમતગમત અને સામાજિક સુવિધાઓના ક્ષેત્રમાં વિકાસનાં કાર્યો થયાં છે.

મહિલા સરપંચ તરીકે હીનાબેન પટેલે પાંચ વર્ષ દરમિયાન ગામના સર્વાંગી વિકાસ માટે કરેલા પ્રયત્નો અને લોકસહકારથી વાંઝ ગામમાં અનેક નવી સુવિધાઓ ઊભી થઈ છે. આ સુવિધાઓ આવનારા સમયમાં પણ ગ્રામજનો માટે ઉપયોગી સાબિત થશે.

સરપંચશ્રી અને તેમની સમગ્ર ટીમનો આભાર

વાંઝ ગામના સામાજિક કાર્યકર શ્રી અશોકભાઈ પટેલ, શ્રી દીપક પટેલ, શ્રી અમીષભાઈ પટેલ, શ્રી અનંત પટેલ સહિત ગામના અગ્રણીઓ અને ગ્રામજનો દ્વારા મહિલા સરપંચશ્રી હીનાબેન પટેલ તથા તેમની સમગ્ર ટીમનો પાંચ વર્ષના કાર્યકાળ દરમિયાન ગામના વિકાસ માટે કરેલી કામગીરી બદલ હૃદયપૂર્વક આભાર વ્યક્ત કરવામાં આવ્યો છે.

સાથે જ ગામના વિકાસમાં સહયોગ આપનાર તમામ અગ્રણીઓ, દાતાઓ, સહયોગીઓ અને ગ્રામજનોને પણ અભિનંદન પાઠવવામાં આવ્યાં છે.

લોકસેવા, જનસહકાર અને વિકાસની ભાવનાથી વાંઝ ગામને પ્રગતિના માર્ગે આગળ લઈ જવામાં સરપંચશ્રી હીનાબેન પટેલ તથા તેમની સમગ્ર ટીમનું યોગદાન પ્રશંસનીય અને અભિનંદનને પાત્ર છે.