કપડવંજના અંતિસર દરવાજા પાસે સ્વચ્છતાના ધજાગરા

કપડવંજ: શહેરના અંતિસર દરવાજા ખાતે આવેલી પોલીસ ચોકીની બાજુમાં આવેલા શુલભ શૌચાલય નજીક સ્વચ્છતાની સ્થિતિ અત્યંત કથળેલી જોવા મળી રહી છે. શૌચાલયની આસપાસ કચરો, વાસી એઠવાડ તેમજ ગંદકીના ઢગલા જોવા મળતા સ્થાનિક નાગરિકોમાં ભારે નારાજગી જોવા મળી રહી છે.

શહેરમાં સ્વચ્છતા જાળવવા માટે નગરપાલિકા દ્વારા વિવિધ કામગીરી કરવામાં આવતી હોવા છતાં અંતિસર દરવાજા જેવા જાહેર સ્થળે ગંદકી જોવા મળતા તંત્રની કામગીરી સામે સવાલો ઊભા થયા છે. ગંદકીના કારણે સમગ્ર વિસ્તારમાં દુર્ગંધ ફેલાઈ રહી છે અને રોગચાળો ફેલાવાની ભીતિ પણ વ્યક્ત કરવામાં આવી રહી છે.

સ્થાનિકોના જણાવ્યા મુજબ આ સ્થળે ગાયોના ટોળાં પણ અવારનવાર જોવા મળે છે, જેના કારણે રસ્તા પરથી પસાર થતા રાહદારીઓ તથા વાહનચાલકોને મુશ્કેલીનો સામનો કરવો પડે છે. જાહેર સ્થળે સ્વચ્છતા જાળવવા માટે નગરપાલિકા દ્વારા જાહેર નોટિસ સહિતની કાર્યવાહી કરવામાં આવે છે, પરંતુ સ્થળ પર નિયમોના ભંગ સામે કડક કાર્યવાહી થતી ન હોવાની ફરિયાદો ઉઠી રહી છે.

તંત્ર દ્વારા તાત્કાલિક સફાઈની માંગ
સ્થાનિક નાગરિકોએ નગરપાલિકા તંત્રને તાત્કાલિક અસરથી સ્થળની સંપૂર્ણ સફાઈ કરાવવા, નિયમિત સફાઈ વ્યવસ્થા ગોઠવવા તેમજ જાહેરમાં કચરો ફેંકનારાઓ સામે દંડાત્મક કાર્યવાહી કરવાની માંગ કરી છે. શુલભ શૌચાલયની આસપાસ સતત સ્વચ્છતા જળવાઈ રહે તે માટે પણ યોગ્ય વ્યવસ્થા કરવાની માગ ઉઠી છે.