पत्रापुरता पाठपुरावा नाही तर प्रत्यक्ष कृती! आ. सुधीर मुनगंटीवार यांच्या प्रयत्नाने मुल-नागपूर बससेवा पुन्हा सुरू

समीर वानखेडे ब्युरो चीफ वंदे भारत लाइव्ह टीव्ही न्यूज:

मुल तालुक्यातील नागरिकांसाठी दिलासादायक बातमी आहे. अनेक दिवसांपासून बंद असलेली मुल-नागपूर एसटी बससेवा अखेर २९ सप्टेंबरपासून. पुन्हा सुरू झाली आहे. आमदार सुधीर मुनगंटीवार यांच्या सातत्यपूर्ण पाठपुराव्यामुळे ही सेवा सुरू झाली आहे.

मुल-नागपूर बससेवा बंद झाल्याने विद्यार्थी, रुग्ण, महिला, ज्येष्ठ नागरिक, दिव्यांग आणि दररोज कामानिमित्त नागपूरला जाणाऱ्या नागरिकांची मोठी गैरसोय होत होती. काही वर्षांपूर्वी या मार्गावर दिवसभरात सुमारे १५ फेऱ्या होत होत्या. ही सेवा म्हणजे केवळ प्रवासाचे साधन नसून शिक्षण, उपचार आणि रोजगाराचा आधार असल्याचे लक्षात घेऊन आ. मुनगंटीवार यांनी हा प्रश्न गंभीरपणे घेतला.

केवळ पत्र नाही, तर थेट पाठपुरावा

आ. मुनगंटीवार यांनी परिवहन मंत्री ना. प्रताप सरनाईक आणि परिवहन विभागाचे अतिरिक्त मुख्य सचिव संजय सेठी यांच्याकडे पत्राद्वारे मागणी केली. मात्र ते एवढ्यावरच थांबले नाहीत.

त्यांनी स्वतः परिवहन मंत्र्यांशी दूरध्वनीवरून संपर्क साधून सेवा तातडीने सुरू करण्याची विनंती केली आणि आपल्या स्वीय सहाय्यकांना विभाग नियंत्रकांकडे पाठवून विभागीय पातळीवर प्रत्यक्ष पाठपुरावा केला. ‘पत्र दिले आणि विषय संपला’ अशी भूमिका न घेता निर्णय जमिनीवर उतरेपर्यंत पाठपुरावा करण्याची त्यांची कार्यशैली पुन्हा एकदा दिसून आली.

मुल शहराचे भौगोलिक, शैक्षणिक आणि व्यापारी महत्त्व लक्षात घेता नागपूरशी थेट बससेवा असणे गरजेचे असल्याचे त्यांनी शासनाच्या निदर्शनास आणून दिले.

लवकरच वाढीव बससेवाही सुरू होणार

आता उमरेड आणि नागपूर डेपोमधून नागपूर-मुल वाढीव बससेवा सुरू करण्यासाठीही आ. मुनगंटीवार यांनी पाठपुरावा सुरू केला असून ती सेवाही लवकरच सुरू होणार आहे.

बससेवा सुरू झाल्याने उपचार, शिक्षण, नोकरी, व्यवसाय आणि शासकीय कामांसाठी नागपूरला जाणाऱ्या मुलवासीयांना मोठा दिलासा मिळाला असून नागरिकांनी आ. सुधीर मुनगंटीवार यांचे आभार मानले आहेत.