अल्लापल्ली येथे राष्ट्र सेविका समितीतर्फे नारीशक्तीचा जागर

अल्लापल्ली येथे राष्ट्र सेविका समितीतर्फे नारीशक्तीचा जागर
‘नारी ही अबला नाही, तर दुर्गा आणि कालीचे शक्तिरूप!’ – माधे खन्ना राणी केशव मित्रा यांचे प्रतिपादन
अल्लापल्ली : राष्ट्र सेविका समितीतर्फे अल्लापल्ली येथे नारीशक्तीचा जागर घडविणारा कार्यक्रम उत्साहात पार पडला. यावेळी उपस्थित महिलांना मार्गदर्शन करताना खना राणी केशव मित्रा यांनी स्त्रीशक्ती, महिला सन्मान, स्वाभिमान आणि सामाजिक एकतेचा प्रभावी संदेश दिला.

यावेळी बोलताना त्या म्हणाल्या की, नारी ही केवळ दुर्गा मातेचे, काली मातेचे शक्तिरूप नाही, तर ती प्रेम, माया, ममता, नम्रता आणि शांततेचेही प्रतीक आहे. भारतीय संस्कृतीत स्त्रीला शक्तीस्वरूप मानले जाते.

मात्र आजही समाजात महिलांचा अपमान, अन्याय आणि अत्याचाराच्या घटना घडत आहेत, ही चिंतेची बाब आहे. स्त्री ही अबला नसून सबला आहे.

तिच्यात अन्यायाविरुद्ध लढण्याची ताकद, संकटांवर मात करण्याचे धैर्य आणि समाजाला योग्य दिशा देण्याची क्षमता आहे. महिलांचा सन्मान आणि प्रतिष्ठा जपणे ही केवळ महिलांची नव्हे, तर संपूर्ण समाजाची जबाबदारी आहे, असे त्यांनी स्पष्ट केले.

समाजात शांतता, नम्रता, प्रेम, माया आणि ममता कायम राहिली पाहिजे; परंतु महिलांवर अत्याचार किंवा अन्याय होत असेल, तर महिलांनी एकत्र येऊन त्याविरोधात आवाज उठवला पाहिजे. अन्याय सहन न करता संघटितपणे संघर्ष करण्यासाठी प्रत्येक महिलेने पुढे यावे, असे आवाहनही त्यांनी केले.

‘नारीचा सन्मान म्हणजे समाजाचा सन्मान आणि नारीशक्तीचा जागर म्हणजे सशक्त समाजनिर्मितीची सुरुवात’, असा संदेश या कार्यक्रमातून देण्यात आला. कार्यक्रमातून महिलांमध्ये आत्मविश्वास, एकजूट, स्वाभिमान आणि अन्यायाविरुद्ध लढण्याची प्रेरणा निर्माण करण्याचा प्रयत्न करण्यात आला.