मुख्याध्यापक महादेव दे यांच्यावर गंभीर आरोप; सेवेतून बडतर्फ करण्याची डॉ. पिंटू पॉल यांची जिल्हाधिकाऱ्यांकडे मागणी

मुख्याध्यापक महादेव दे यांच्यावर गंभीर आरोप; सेवेतून बडतर्फ करण्याची डॉ. पिंटू पॉल यांची जिल्हाधिकाऱ्यांकडे मागणी
गडचिरोली : जिल्ह्यातील जिल्हा परिषद शाळांशी संबंधित कथित गैरवर्तनाच्या प्रकरणांमुळे मुख्याध्यापक महादेव दे यांच्या कार्यपद्धतीवर गंभीर प्रश्न उपस्थित करण्यात आले आहेत.

त्यांना मुख्याध्यापक पदावरून हटवून सेवेतून बडतर्फ करण्यात यावे, अशी मागणी स्वतंत्र भारत पक्ष – शेतकरी संघटनेचे प्रतिनिधी डॉ. पिंटू दयाळ पॉल यांनी जिल्हाधिकारी, गडचिरोली यांच्याकडे लेखी निवेदनाद्वारे केली आहे.

डॉ. पॉल यांनी दिलेल्या निवेदनानुसार, गौरिपूर गावातील काही ग्रामस्थ, सरपंच, शाळा शिक्षण समितीचे प्रतिनिधी आणि स्थानिक नागरिकांच्या कथित वक्तव्यांचे व्हिडिओ पेनड्राइव्हद्वारे गटविकास अधिकारी यांच्याकडे सादर करण्यात आले आहेत.

या व्हिडिओंमध्ये शिल्पा कायत नावाच्या मुलीने सातवीत शिकत असताना मुख्याध्यापक महादेव दे यांच्याकडून गैरवर्तन झाल्याची माहिती आपल्या आईला दिल्याचे सांगितले जाते. त्यानंतर गावात बैठक घेऊन संबंधित व्यक्तीने माफी मागितल्याचा दावाही व्हिडिओतील वक्तव्यांमध्ये करण्यात आल्याचे निवेदनात नमूद आहे.

तसेच, याच मुख्याध्यापकांच्या येनापूर क्रमांक १६ येथील सध्याच्या नियुक्तीदरम्यान अशोक बिस्वास यांच्या भाचीशी कथित गैरवर्तन झाल्याचा आरोपही करण्यात आला आहे. या संदर्भातील व्हिडिओ आणि संबंधित व्यक्तींची वक्तव्ये प्रशासनाकडे सादर केल्याचे डॉ.

पॉल यांनी सांगितले. जयनगर आणि विकसपल्ली येथील प्रकरणांचाही उल्लेख
जयनगर येथील व्हिडिओमध्ये स्थानिक महिला, ग्रामसेवक, ग्रामपंचायत कर्मचारी आणि नागरिक निरंजन चक्रवर्ती यांनी शाळेतील कथित गैरवर्तनासंदर्भात माहिती दिल्याचा दावा निवेदनात करण्यात आला आहे.

तसेच शांती नावाच्या तिसरीतील विद्यार्थिनीने आपल्या पालकांना सांगितलेल्या कथित घटनेचाही उल्लेख करण्यात आला आहे. विकसपल्ली येथील दीपक बिस्वास यांच्या पत्नीच्या मृत्यूशी संबंधित प्रकरणातही महादेव दे यांच्याविषयी गंभीर आरोप करण्यात आल्याचे निवेदनात म्हटले आहे.

माजी सरपंच सुनील बिस्वास, निवृत्त अंगणवाडी सेविका शंकरी मजुमदार, डॉ. रमेश आणि अन्य ग्रामस्थांच्या व्हिडिओतील वक्तव्यांचा संदर्भ देण्यात आला आहे.

संबंधित महिलेने विष प्राशन करून आत्महत्या केल्याचा दावा या वक्तव्यांमध्ये असल्याचेही नमूद करण्यात आले आहे. डॉ.

पॉल यांनी स्पष्ट केले की, या सर्व आरोपांची स्वतंत्र, निष्पक्ष आणि सखोल चौकशी करून संबंधित व्यक्तींचे जबाब, उपलब्ध व्हिडिओ, कागदपत्रे आणि अन्य पुरावे तपासणे आवश्यक आहे. त्यांच्या स्वतःच्या मुलीशी तसेच भावाच्या मुलीशी संबंधित कथित गैरवर्तनाबाबतचे लेखी जबाबही माधुरी कुर्शेंगे यांच्याकडे सादर केल्याचे त्यांनी सांगितले.

मुख्य कार्यकारी अधिकाऱ्यांच्या भूमिकेवरही प्रश्न
मुख्याध्यापक महादेव दे यांच्यावर यापूर्वीही तक्रारी व पुरावे सादर करूनदेखील ठोस कारवाई झालेली नसल्याचा आरोप डॉ. पॉल यांनी केला आहे.

२८ सप्टेंबर २०२६ रोजी मुख्य कार्यकारी अधिकाऱ्यांशी दूरध्वनीवर झालेल्या संभाषणात संबंधित अधिकाऱ्यांनी त्यांना पदावरून हटविणे शक्य नसल्याचे सांगितल्याचा दावा त्यांनी केला आहे. कारवाई न झाल्यास आमरण उपोषणाचा इशारा
जिल्हाधिकाऱ्यांनी या प्रकरणाची गंभीर दखल घेऊन मुख्याध्यापक महादेव दे यांना तातडीने पदावरून दूर करावे, निष्पक्ष चौकशी करावी आणि दोष सिद्ध झाल्यास नियमानुसार सेवेतून बडतर्फ करण्याची कारवाई करावी, अशी मागणी निवेदनातून करण्यात आली आहे.

प्रशासनाकडून समाधानकारक निर्णय न झाल्यास महाराष्ट्राचे मुख्यमंत्री, राज्यपाल, पंतप्रधान आणि राष्ट्रपती यांच्याकडे अंतिम निवेदन सादर करून न्याय मिळेपर्यंत आमरण उपोषण करण्याचा इशाराही डॉ. पिंटू दयाळ पॉल यांनी दिला आहे.

या संपूर्ण प्रकरणात प्रशासनाने केवळ तक्रारींची नोंद न घेता उपलब्ध पुराव्यांची निष्पक्ष पडताळणी करावी, संबंधित विद्यार्थिनी व महिलांची ओळख आणि गोपनीयता सुरक्षित ठेवावी आणि चौकशीच्या निष्कर्षांसह कारवाईबाबत लेखी उत्तर द्यावे, अशी त्यांची मागणी आहे. – डॉ.

पिंटू दयाळ पॉल
प्रतिनिधी, स्वतंत्र भारत पक्ष – शेतकरी संघटना