ચોટીલા તળેટીમાં 40 ફૂટના મુખ્ય માર્ગ પરથી દબાણો દૂર કરાયા ડેપ્યુટી કલેક્ટર, મામલતદાર અને પોલીસની ટીમે JCBની મદદથી શેડ અને છાપરાં હટાવ્યાં

ચોટીલા: ચોટીલા તળેટીથી શ્રી ચામુંડા માતાજીના મંદિર તરફ જતા આશરે 40 ફૂટના મુખ્ય માર્ગ પરથી ગેરકાયદે દબાણો દૂર કરવાની કામગીરી હાથ ધરવામાં આવી હતી. ડેપ્યુટી કલેક્ટર, મામલતદાર અને પોલીસની ટીમે પોલીસ બંદોબસ્ત વચ્ચે JCBની મદદથી દુકાનોની બહાર ઊભા કરવામાં આવેલા શેડ અને છાપરાં દૂર કર્યાં હતાં.

મળતી માહિતી મુજબ, દુકાનોની બહાર ઊભા કરવામાં આવેલા શેડ અને છાપરાંને કારણે માર્ગ સાંકડો બનતો હોવાની ફરિયાદો ઉઠી હતી. અગાઉ પણ આ વિસ્તારમાંથી દબાણો દૂર કરવામાં આવ્યાં હતાં, પરંતુ ફરીથી દબાણો ઊભાં થતાં અવરજવર અને ટ્રાફિકને અસર થતી હોવાની રજૂઆતો કરવામાં આવી હતી.

ચોટીલા તળેટીનો આ માર્ગ માતાજીનાં દર્શનાર્થે આવતા હજારો શ્રદ્ધાળુઓ માટે મહત્વપૂર્ણ છે. દબાણો દૂર થતાં માર્ગ ખુલ્લો રહેશે અને ટ્રાફિકની સમસ્યામાં રાહત મળશે તેવી આશા વ્યક્ત કરવામાં આવી છે.

વહીવટી તંત્ર દ્વારા માર્ગ પર ફરીથી દબાણો ન થાય તે માટે ચેતવણી આપવામાં આવી હોવાનું જાણવા મળ્યું છે. જો ફરી દબાણો ઊભાં થશે તો કડક પગલાં લેવામાં આવશે તેમજ સમગ્ર વિસ્તાર પર દેખરેખ રાખવામાં આવશે.