प्रेमप्रकरणातून वाद? १९ वर्षीय तरुणीचा संशयास्पद मृत्यू

प्रेमप्रकरणातून वाद? १९ वर्षीय तरुणीचा संशयास्पद मृत्यू; सावरटोला परिसरात खळबळ
नवेगावबांध (सावरटोला), जिल्हा गोंदिया : सावरटोला येथे १९ वर्षीय तरुणी मुस्कान दिलीप मेघ्राम हिचा ९ नोव्हेंबरच्या रात्री संशयास्पद परिस्थितीत मृत्यू झाल्याची घटना उघडकीस आली आहे.

या घटनेमुळे परिसरात मोठी खळबळ उडाली असून नागरिकांमध्ये हळहळ व्यक्त केली जात आहे. मिळालेल्या प्राथमिक माहितीनुसार, रात्रीच्या सुमारास मुस्कान आणि तिच्या ओळखीतील एका तरुणामध्ये मोबाईलवरून संभाषण सुरू होते.

या संभाषणादरम्यान काही कारणावरून वाद झाल्याची माहिती कुटुंबीयांकडून देण्यात आली आहे. दरम्यान, रात्री जेवणासाठी आलेल्या नातेवाइकांना घराचा दरवाजा बंद असल्याचे आढळले.

आवाज देऊनही प्रतिसाद न मिळाल्याने पाहणी केली असता मुस्कान मृतावस्थेत आढळली. पोलिसांकडून तपास सुरू
घटनेची माहिती मिळताच मोरगाव पोलिसांनी घटनास्थळी धाव घेतली.

आकस्मिक मृत्यूची नोंद करून पुढील तपास सुरू करण्यात आला आहे. सदर मृत्यूचा प्रेमप्रकरणातील वादाशी काही संबंध आहे का, यासह विविध शक्यतांचा पोलीस तपास करीत आहेत.

१९ वर्षीय तरुणीच्या अशा संशयास्पद मृत्यूमुळे सावरटोला परिसरात शोककळा पसरली आहे. मृत्यूमागील नेमके कारण काय, याबाबत पोलिसांच्या तपासानंतरच स्पष्टता येणार आहे.

मृत्यूचे नेमके कारण शोधून सत्य परिस्थिती जनतेसमोर आणण्याची मागणी नागरिकांकडून होत आहे.