પુસ્તક પરબમાં વાંચનપ્રેમીઓની ઉપસ્થિતિ સાથે પુસ્તકદાન અને પુસ્તક સમીક્ષાનો સુંદર કાર્યક્રમ યોજાયો

પુસ્તક પરબમાં વાંચનપ્રેમીઓની ઉપસ્થિતિ સાથે પુસ્તકદાન અને પુસ્તક સમીક્ષાનો સુંદર કાર્યક્રમ યોજાયો

માતૃભાષા અભિયાન અને શ્રી અરવિંદ કેન્દ્રના સંયુક્ત ઉપક્રમે 1 નવેમ્બર, 2026ના રોજ પુસ્તક પરબનું આયોજન કરવામાં આવ્યું હતું. વાંચન સંસ્કૃતિના પ્રસાર અને સમાજમાં પુસ્તકો પ્રત્યેનો લગાવ વધારવાના હેતુથી યોજાતા આ માસિક પુસ્તક પરબમાં વિવિધ વાચકોએ ઉત્સાહભેર ઉપસ્થિત રહી પુસ્તકોનું અવલોકન કર્યું હતું અને વાંચનપ્રવૃત્તિમાં સહભાગી બન્યા હતા.

કાર્યક્રમ દરમિયાન આરતીબેન લાઠિયાએ 'ભોગવે તેની ભૂલ' પુસ્તકની સુંદર સમીક્ષા પ્રસ્તુત કરી હતી. પુસ્તકના વિષયવસ્તુ અને તેના વિચારપ્રેરક પાસાંઓને વાચકો સમક્ષ રજૂ કરી વાંચનનો એક નવો દૃષ્ટિકોણ પૂરો પાડ્યો હતો. આ ઉપરાંત ચાવડા અનિતાબેન દ્વારા અરવિંદ કેન્દ્રના ટ્રસ્ટી શ્રી પટવર્ધન અંકલનો પુસ્તક વાંચન અંગેનો સંદેશ વાચકો સુધી પહોંચાડવામાં આવ્યો હતો.

પુસ્તક પરબને વધુ સમૃદ્ધ બનાવવામાં પુસ્તકપ્રેમીઓનો પુસ્તકદાન દ્વારા મળતો સહયોગ પણ નોંધપાત્ર રહ્યો હતો. રાજુલબેન વ્યાસ અને ભરતભાઈ પંડયા તરફથી પુસ્તકો ભેટરૂપે અર્પણ કરવામાં આવ્યાં હતાં. તેમના આ પુસ્તકદાન બદલ પ્રમાણપત્ર આપીને સન્માનિત કરવામાં આવ્યા હતા. આ ઉપરાંત આદરણીય કવિ શ્રી કિશોર જીકાદરા સાહેબ તરફથી પણ પુસ્તક પરબને પુસ્તકોનું દાન મળ્યું હતું, જે વાંચનપ્રવૃત્તિ પ્રત્યેની તેમની નિષ્ઠા અને સહભાગિતાનું સુંદર ઉદાહરણ છે.

કાર્યક્રમની વ્યવસ્થામાં વિશાલભાઈ અને યોગેશભાઈએ પુસ્તકોને વ્યવસ્થિત રીતે મૂકવા અને ગોઠવવામાં ઉત્સાહપૂર્વક સહયોગ આપ્યો હતો. સમગ્ર કાર્યક્રમનું આયોજન, સંચાલન અને વિવિધ કામગીરી પારુલબેન મહેતા દ્વારા ખૂબ જ સુંદર રીતે સંભાળવામાં આવી હતી.

પુસ્તક પરબ માત્ર પુસ્તકોના આદાનપ્રદાનનું સ્થળ નથી, પરંતુ વાંચનપ્રેમીઓના મિલન, વિચારોના વિનિમય, જ્ઞાનના પ્રસાર અને સમાજમાં વાંચનની સંસ્કૃતિને જીવંત રાખવાનું એક સુંદર માધ્યમ બની રહ્યું છે. પુસ્તકદાન આપનાર દાતાઓ, ઉપસ્થિત વાચકો અને આયોજનમાં સહયોગ આપનાર તમામ કાર્યકરોના સહિયારા પ્રયાસોથી આ પુસ્તક પરબ વધુ અર્થપૂર્ણ અને સફળ બન્યું હતું.

માતૃભાષા અભિયાન અને શ્રી અરવિંદ કેન્દ્ર દ્વારા વાંચનસંસ્કૃતિના સંવર્ધન માટે હાથ ધરવામાં આવતી આ પ્રવૃત્તિમાં સૌનો સહકાર અને સહભાગિતા પ્રેરણારૂપ બની રહ્યાં છે.

રિપોર્ટર સુદીપ ગઢીયા 9909622115