કપડવંજ સીએસસી ખાતે ટીબીના દર્દીઓને અમૂલ ડેરી દ્વારા પોષણ કીટનું વિતરણ

કપડવંજ : ટીબી મુક્ત ભારત અભિયાન અંતર્ગત આજરોજ કપડવંજ સીએસસી (કોમ્યુનિટી હેલ્થ સેન્ટર) ખાતે ટીબીના લાભાર્થીઓને અમૂલ ડેરી તરફથી પોષણ કીટનું વિતરણ કરવામાં આવ્યું હતું. ટીબીના દર્દીઓને પોષણયુક્ત આહાર મળી રહે અને તેઓ સારવાર દરમિયાન સ્વાસ્થ્ય જાળવી શકે તેવા ઉમદા હેતુથી આ કાર્યક્રમનું આયોજન કરવામાં આવ્યું હતું.

આ પ્રસંગે મુખ્ય મહેમાન તરીકે અમૂલ ડેરીના ડિરેક્ટર શ્રી ચેતનસિંહ પરમાર, કપડવંજ નગરપાલિકાનાં પ્રમુખ શ્રીમતી સેજલબેન પટેલ, મામલતદારશ્રી, તાલુકા હેલ્થ ઓફિસર શ્રી અંકુરભાઈ પટેલ, ટીબી સુપરવાઇઝર શ્રી જયદીપસિંહ ચાવડા, શ્રી કિશનભાઈ પરીખ, અર્બન મેડિકલ ઓફિસરશ્રી તથા થશે ટી.એચ.એસ.શ્રી રમેશભાઈ પટેલ સહિતના મહાનુભાવો ઉપસ્થિત રહ્યા હતા. કાર્યક્રમ દરમિયાન ટીબીના લાભાર્થીઓને પોષણ કીટ અર્પણ કરવામાં આવી હતી.

ટીબીના દર્દીઓની સારવારની સાથે પૌષ્ટિક આહારનું પણ વિશેષ મહત્ત્વ છે. આવા સેવાકીય પ્રયાસોથી દર્દીઓને પોષણ સહાય મળી રહે છે અને ટીબી મુક્ત ભારતના સંકલ્પને સાકાર કરવામાં મદદ મળે છે.

કાર્યક્રમને સફળ બનાવવા કપડવંજ અર્બન હેલ્થ સેન્ટરના તબીબી અધિકારીઓ અને સમગ્ર અર્બન સ્ટાફે ઉત્સાહપૂર્વક સહયોગ આપ્યો હતો. કાર્યક્રમના અંતે ઉપસ્થિત મહાનુભાવો, સહયોગીઓ અને સ્ટાફનો આભાર વ્યક્ત કરવામાં આવ્યો હતો.