अहिल्यानगरमधील निंबळक बायपास रोडवरील लामखेडे पेट्रोल पंपासमोर असलेल्या सिमेंटच्या नाल्यात सोमवारी सायंकाळी एक मृतदेह आढळून आला. स्थानिक पोलिस आणि गुन्हे शाखेच्या पथकाने त्वरित तपास सुरू केला. मृतदेह ओळख पटवण्यासाठी पोलिस प्रयत्नशील आहेत.
बेपत्ता व्यापाऱ्याशी संबंध
गेल्या १५ दिवसांपासून शहरातील एक व्यापारी बेपत्ता असल्याची तक्रार तोफखाना पोलिस ठाण्यात दाखल आहे. नाल्यात आढळलेला मृतदेह त्याचाच असल्याची शक्यता वर्तवली जात आहे. पोलिस या दिशेने तपास करत असून डीएनए चाचणीसह विविध वैज्ञानिक पद्धतींचा वापर करून मृतदेहाची ओळख पटवण्याचा प्रयत्न करत आहेत.
संशयित आरोपींनी खुनाची कबुली दिली
स्थानिक गुन्हे शाखेच्या पथकाने या प्रकरणात दोन संशयितांना ताब्यात घेतले आहे. पोलिसांनी त्यांची कसून चौकशी केली असता, त्यांनी खून करून मृतदेह नाल्यात फेकल्याची कबुली दिली आहे. मात्र, मृतदेह जवळपास ५० ते ६० फूट लांब नाल्यात सापडल्यामुळे त्याची ओळख पटवणे कठीण ठरत आहे.
पोलिस तपास
पोलिस आता मृतदेह बाहेर काढण्यासाठी विशेष तांत्रिक पथकाची मदत घेत आहेत. तसेच, आरोपींनी खून कशा कारणांमुळे केला, याचा शोध घेतला जात आहे. या घटनेमुळे परिसरात भीतीचे वातावरण निर्माण झाले असून, स्थानिक नागरिकांमध्ये मोठी चर्चा सुरू आहे.
