विज्ञान दिन निमित्त आयोजित

पुणे खोडद (पुणे)

विज्ञान दिनानिमित्त खोडद येथे हॅम रेडिओचे प्रात्यक्षिक, 21 हजार विद्यार्थ्यांनी दिली भेट; अभियांत्रिकी विद्यार्थ्यांचा मोठा प्रतिसाद, हॅम रेडिओचे महत्त्व अधोरेखित

खोडद (पुणे): GMRT आणि TIFR खोडद यांच्या वतीने विज्ञान दिनानिमित्त आयोजित विज्ञान प्रदर्शनात शिर्डी अमॅच्युअर रेडिओ क्लब आणि पुणे हॅम्स रेडिओ क्लब (VU2RCP) यांनी सहभाग घेतला. या प्रदर्शनात हॅम रेडिओची माहिती आणि प्रात्यक्षिक सादर करण्यात आले. नैसर्गिक आपत्तीच्या वेळी हॅम रेडिओचा कसा उपयोग होतो, हे प्रात्यक्षिक करून दाखवण्यात आले.

हॅम रेडिओ म्हणजे काय?

हॅम रेडिओ, ज्याला ‘अमॅच्युअर रेडिओ’ म्हणूनही ओळखले जाते, हे एक हौशी रेडिओ संवाद माध्यम आहे. यामध्ये प्रशिक्षित व्यक्ती रेडिओ लहरींचा वापर करून एकमेकांशी संवाद साधतात. नैसर्गिक आपत्तीच्या वेळी जेव्हा सर्व संपर्क यंत्रणा कोलमडतात, तेव्हा हॅम रेडिओ अत्यंत उपयुक्त ठरतो. तसेच, हे एक सरकार-प्रोत्साहित छंद आहे, ज्यामुळे लोकांना आपत्कालीन परिस्थितीत मदत करण्यासाठी प्रशिक्षित केले जाते.

थेट प्रात्यक्षिकात आंतरराष्ट्रीय संपर्क:

थेट प्रात्यक्षिकादरम्यान, हॅम बँडमधील High Frequency (HF) वापरून युक्रेन, हैदराबाद, बेळगाव, पुणे इत्यादी ठिकाणच्या हॅम ऑपरेटरशी संपर्क साधण्यात आला, ज्यामुळे हॅम रेडिओच्या जागतिक क्षमतेचे प्रदर्शन झाले.

या प्रदर्शनाला महाराष्ट्र अग्निशमन सेवा संचालक श्री. संतोष वारिक, NCRA-TIFR चे केंद्र संचालक आणि GMRT प्रमुख श्री. यशवंत गुप्ता यांच्यासह अनेक मान्यवरांनी भेट दिली. महाराष्ट्रभरातून सुमारे 21 हजार विद्यार्थी आणि पालकांनी प्रदर्शनाला भेट दिली. विशेषतः अभियांत्रिकी विद्यार्थ्यांनी हॅम क्लबचे सदस्य होण्यासाठी नोंदणी केली आणि हॅम बनण्याची इच्छा दर्शवली.

या प्रदर्शनात हॅम रेडिओची माहिती आणि प्रात्यक्षिक देण्यासाठी श्री. परशुराम कुटे (समन्वयक), डॉ. महेश दत्तात्रय पाटील, श्री. मनीष घाडगे, श्री. दत्तात्रय घाडगे, श्री. तनिष्क कुलकर्णी, श्री. वसंत कुरे आणि कार्याध्यक्ष श्री. विलास रबडे यांनी परिश्रम घेतले.

शिर्डी अमॅच्युअर रेडिओ क्लबचे अध्यक्ष डॉ. करण घुले, हॅम ऑपरेटर डाॅ. किशोर गळनिंबमकर आणि दिलीप बापट यांनी या यशस्वी प्रात्यक्षिकाबद्दल टीमचे अभिनंदन केले.

रिपोर्टर, रविलाल गंगादास पटेल

संगमनेर जि, अहिल्या नगर